بقلم اسماعيل مصطفى

المسمار الأول.. لولاك الحمد لله اللي ربي جابك في زمانا هظا مش عارفين شنو كان يصير لو ربي ما لطف بينا وتم الاتفاق على حضرتك.. كأنك جيتنا من السما الكل اتفق عليك رغم اختلافنا على كل شي..   المسمار الثاني.. الصمت المهيب أص وطي صوتك راهو سيادة ... جا.. اص يا راجل راهو قاعد يبحت فيك.. باهي خلينا نسكتوا سيادته شكله قاعد يفكر.. اسمع اسكت شكله يبي يصبي ويطلع يا ريت ما يكون زعل من حد منا.   المسمار الثالث.. كلامك عين الحكمة سبحان الله ما شاء الله (طبعا عبارات التعجب تختلف بحسب صنف فرعون) ايجيب فيها من الأخير نحن لنا ساعتين نبرم ونلف ومش قادرين نوصولوها بس سعادة ... قدر يمسكها ويحطها قدامنا من الآخر ملا عبقرية وحكمة لنقانا كلامك يا سيادة ... عين الحكمة.   المسمار الرابع.. رد بالك تخالفه راهو يزعل منك اسمع ارفع يديك ووافق على أي موضوع يرفع هو يده عليه حتى لو جيت متأخر ومش عارف شنو الموضوع ارفع يدك أو نزلها وراه هو اللي يبي اختاره واللي ما يبيش ارفضه وصر على رفضه.   المسمار الخامس.. صح كلامكم بس لازم تقنعه يا جماعة راني مش مختلف معاكم اللي تقولوا فيه هو الصح والأضمن للبلاد بس ما ينفعش انقولوه قدامه هكي مرة وحدة وإنت عارفين إن هو ضد الفكرة هذي.. خلوني انحاول معاه نشوف مزاجه وبلكي حكيته معاه وربنا يستر ما يتعقدش مني.   المسمار السادس.. إنت صمام الأمان يا سيادة ... ما تزعلش روحك هظوم شوية رعاع وفوضويون راك إنت صمام الأمان ونحن من غيرك رانا نقعدوا زي القزازين ملناش إلا إنت في هالدنيا ربي يطول عمرك ويعطيك الصحة وخلاص يا سيادة ... بالله ما تزعلش.   المسمار السابع.. الطائرة الخاصة جاهزة جهزنا الطائرة الخاصة والرحلة مرتبة يا سيادة ... وتو يستقبلك إنت والعيلة سفيرنا غادي وادير الجولة اللي تبيها مع حرمك المصون والبنات والشباب بنفس ما طلبت بالزبط والرجعة تكون قبل موعد وصول ضيوفكم.. المهم استمتعوا بالرحلة راك تعبت واجد الايام اللي فاتت يا سيادة ... وتحتاج تريح روحك وتستجم ربي ما يحرمنا منكم وادوم لنا.   المسمار الثامن.. كل اللي تبيه تم نعم يا سيادة ... كل اللي تبيه وطلبته تم، نعم الفيلا خذيناها في نفس الحي وشركة الأثاث قاعد تؤثث فيها بنفس الطلبات اللي وصيتنا عليها وممكن ابن سيادتك يشرفنا يشوف التشطيبات والتأثيث، المهم تكون راضي علينا.   المسمار التاسع.. ما عاش اللي يحاسبك يا سيادة ... تي والله انسوه اسمه يا سيادة ... شنو والَا هو حتى يصرح بهالكلام بسيطة يا سيادة ... اتصلت بالجهات المعنية حتى يتخذوا ضده كل الإجراءات الردعية ولو كررها نكره نا من وذنه ونرميه في الحبس وجيب من يطلعه بعدها.   المسمار العاشر.. اعتبر كل شي ما صارش/اعتبر كل شي صار نعم نعم أكيد أكيد نعم أكيد كل شي انتهى يا سيادة ... خلاص ما فيش حاجة انصرفت ولا أي شي صار تو نلغوا كل شي ونحنا آسفين اللي تجاوزنا سيادتك، بس نحن ما حبينش نزعجوك واحسبنا إن هظا اللي تبيه.. لا ما في مشكة ومش حيكلف الدولة شي اللي قلت عليه هو عين الحكمة واعتبره تم من توا هي مسألة وقت وبشرط مش وقت واجد والمقترح اللي تفضلت بيه سيادتك يكون جاهز، ومش محتاج إي مشورة فنية فكلامك أوضح من الشمس زي العادة.